لقاءٌ صحفي مع الكاتبة الصاعدة تسنيم محمد المغربي
حِوارٌنا اليوم مع كاتبةٌ بدأت المسيرة الأدبية منذ فترةٍ ليست بقليلة وفي سنٍ صغير ، تميزت في كتابتها القريبة من القُراء، هيا بنا نتعرف على الكاتبة تسنيم محمد
1-نبذة تعريفية عنك؟
تسنيم محمد المغرَبي، ١٨ سنة، من اسكندرية
بدأت كتابة من ٢٠١٩ تقريبا لمدة سنة ووقفت سنة بسبب عدة عوامل هنوضحها سوا ورجعت تاني في أول سنة ٢٠٢٢ وللآن الحمد لله.
2-متى بدأت مسيرتك الإدبية؟
لو هنتكلم على الكتابة كموهبة فأنا من صغري كنت بحب أكتب جدًا حتى وانا طفلة ولكن بدأت آخد خطوة جدية وأنشر أعمالي في سنة ٢٠١٩.
3-هدفك من الكتابة؟
الحقيقة انا يوم ما قعدت مع نفسي وقررت إني هنشر اللي بكتبه يومها أخدت عهد على نفسي إن كل حرف أنشره يغير ولو من إنسان واحد بس دة عندي بالدنيا وصدقًا جاتلي لحظات كتير كنت هستسلم فيها وأمشي ورا الموج وطريقة الكتابة اللي بتشهر أسرع ولكن الحمد لله قدرت للآن أحافظ على عهدي مع نفسي واللي خلقها ومكتبتش حرف أتحاسب عليه قدام ربنا ودة من كرمه عليا.
4- من الداعم الأساسي لكِ منذ بداية المسيرة الأدبية؟
اول حد كلمته وقولتله إني هبدأ كتابة كانوا عيلتي وحقيقي دعموني بشكل كبير وقتها رغم إن كنت فعليا محدش يعرفني غير ٢٠ فرد مثلا..
والحمد لله لحد الآن ال٢٠ فرد بقوا آلاف وبعد ما كنت بتعلم إزاي أكتب بقيت بعلم الناس إزاي تكتب وكل دة هم دايمًا الداعم الأول ليا واكتر ناس تعباهم معايا من أول المشوار.
5- كيف تتعاملين مع الأراء السلبية؟
بصراحة انا عكس ناس كتير بس انا بحترم جدًا الآراء السلبية بل ممكن نقول إنها الأساس اللي اتعلمت منه أصلح أخطائي..
فأنا كتسنيم مقتنعة إن اللي مينصحنيش إذا هو مش عايز لي نجاح ولكن طبعا الأساليب تفرق.
6- هل لكِ أعمالٌ سابقة ورقية أو إلكترونية؟
لحد الآن كل أعمالي تنحصر في الاسكريبتات"القصص القصيرة" والنصوص والخواطر وبعض المقالات وشاركت مرة في كتاب مجمع "همسة قلم" ..
ولكن في نية لتحضير عمل في معرض الكتاب بإذن الله لكن لا يعلم موعد إكتماله إلا الله.
7- خاطرة لكِ.
"كم أودُّ الهُروب من ذلك العالَم القاسِ وأسكُن هُنا في مُقلتَيك، أُخبرُك عمّا يُحزِن قلبي ونتقاسم حُزني سويًّا،
ويبقى السؤال الذي لا يُفارق ذِهني..ماذا لو لم نفترق..؟
#تَسنِيم_المَغرَبِي
8- من هو مثلك الأعلى في الكِتابة؟
كتسنيم مقتنعة إن مش صح شخص يكون ليه "مثل أعلى" ..
ليه مكتسبش الحلو اللي في كل شخص وأطبقه بإسلوب تسنيم وتكون شخصية منفردة بذاتها؟
9-حدثينا عن الخطط المستقبلية لكِ في مجال الكِتابة؟
بإذن الله مكملين زي ما احنا طبعا في كتابة الاسكريبتات والنصوص والخواطر والمقالات، وقريب هعلن عن كورس اسكريبتات هكون المسؤولة عنه في مبادرة طيف اللي بالمناسبة ليها فضل كبير في اللي وصلتله دلوقتي.. وطبعا بتمنى أقدر آخد خطوة إن يكون ليا عمل في المعرض خلال السنوات القادمة.
10- هل واجهتك صعوبات في مجال الكتابة؟ وكيف تغلبتي عليها؟
طبعًا وأولهم الوقت والطريقة اللي بدأت بيها مشواري..
لما بدأت كتابة في ٢٠١٩ مكانش وقتها الوسط الأدبي منتشر زي دلوقتي وكنت انا سني صغير ومعنديش علاقات تمامًا، بل وكمان مكانش عندي العلم الكافي للكتابة ولا للتسويق لكتاباتي .
كل دة سوا أدى في الآخر لتوقفي عن الكتابة لسنة كاملة.
واتغلبت عليه مع اختلاطي بالوسط الأدبي الحالي أكثر..
بدأت أكون صداقات واتعلم من اسلوب كل شخص تكة صغيرة بدأت اقرأ كتير وأدخل كورسات واسأل ناس خبرتهم أعلى مني وأسوق لكتاباتي صح..
والحمد لله دلوقتي بقا اسلوبي معروف ومميز في الكتابة وبقا أكتر حاجة القراء بيعلقوا عليها.
11- أي الأنواع تفضلين في الكتابة؟
انا بفضل عامة القراءة باللغة العربية بالذات في الكتابات الدرامية والرومانسية ولكنه مسؤولية كبيرة الحقيقة ومحتاج دقة مع ذلك هو المقرب لقلبي ولكن بكتب باللغة العامية طبعا لإن لا غنى عنها دائما.
12- بالنسبة لكِ الكتابة موهبة أم أي شخص يستطع أن يكتُب؟
الكتابة موهبة زيها زي أي موهبة في الدنيا..
لازم ربنا يكون مديها للشخص أولا ولكن مش معنى إن عندي الموهبة إني أكتب على طول فزي أيموهبة تانية هي محتاجة تدريب وممارسة.
13-ما سرُ النجاح في الكتابة من رأيك؟
من وجهة نظري ومهما كتروا الناس اللي بيختاروا الطريق السهل ولكن من يتقِ الله يكرمه من فضله.. بس كدة.
14-نصيحتك للمبتدئين في مجال الكتابة أو أي مجال آخر؟
من رأي الكاتب لازم يكون متواضع وقريب من قرائه قبل اي حاجة عشان يواكب أفكارهم ويكونوا بيحبوه بجد مش مجرد عدد على الفاضي.
15- أولا للنجاح في أي مجال حط دايمًا ربنا قدامك ..
متختارش طريق يشهرك دلوقتي ويوقفك بعدين قدام ربنا بجبال من الذنوب.
ثانيا رأي الناس ورا ضهرك اللي شايفك بتعمل حاجة تافهة واللي شايف مجودك لا يحترم كل دول افتكرهم بس وانت واقف بتتكرم نتيجة إصرارك ومحاولتك.
وخلي عندك دايمًا أمل إن طول ما بتجرب وتحاول هتنجح لو مش دلوقتي يبقا بعدين .
وبالتوفيق للجميع يا رب.
كان لقاءٌ جميل مع الكاتبة تسنيم محمد.
وجريدة أثر يستحق أن يرى تتمنى للكاتبة تسنيم محمد كل التوفيق في حياتها وأن تتفوق في حياتها الأدبية دائما.
بقلم صاحبة الجريدة: بسملة رجب
تعليقات
إرسال تعليق