حوارٌ صحفي مع تيم beginners عن رياضة الأسكيت وكل ما يخصها
إن قوة الجسم والشخص الرياضي، تنعكس على قوة عقلِه وسلامُ نفسيتُه، لذلك حديثُنا اليوم مع التيم الرياضي Beginners.
دعونا نتعرف على رياضه ال skate والتيم وكل ما يخُصهم..
1- نبذة تعريفية عن التيم؟
التيم اسمو Beginners
فكره الاسم جت من اننا ننزل نتعلم مع بعض ولو حد مبتدأ بنساعده لحد ما بقينا بنعمل events تعليميه بتكون تقريباً كل اسبوع وطبعا بدون اي مقابل مادى وهدفنا هو أننا ننشر رياضه الاسكيت فى مصر.
2-أمتى التيم بدأ في النزول على أرض الواقع؟
التيم اتعمل يوم٢٠٢٢/٧/١٣
واول مره نزلنا كان يوم٢٠٢٢/٧/٢٠
3-أي فائدة رياضة الأسكيت؟ رياضه الاسكيت بتساعد علي تقويه عضلات القدم وبتساعد علي زياده اللياقه البدنيه وتساعد علي تقويه التوازن لدي اللاعب وحرق السعرات الحرارية وتقوي القلب وتنشيط الدورة الدموية.
4-إزاي أثرت رياضة ال skate عليكم للأحسن ؟
عرفتنا ناس جديده وناس كويسه جدا وخليتنا نعرف نواجه المجتمع ومنهتمش بكلام الناس نظراً ان فى ناس كتير جدا بتضايقنا فى الشارع بسبب عدم تقبلهم للاسكيت ونفسيتنا بقت احسن كتيييرر
5_أي شيء له سلبيات وإيجابيات ف إي هي سلبيات وإيجابيات رياضة ال skate ؟
سلبياتها طبعا في الأشخاص اللي بيشوهو صوره الرياضه دي وطبعا أن احيانا بيبقي فيه تهور من اللاعب إيجابياتها طبعا زى ما قولنا انها عرفتنا على ناس كويسه وخليتنا نبص للحياه بشكل افضل و رياضه ممتعه جدا وممكن نستخدم الاسكيت ك وصيله مواصلات زي العجله كده
6- أحكولنا عن بداية يومكم مع التيم؟
بنبتدى نتجمع على الساعه2العصر فى ممشى اهل مصر وبعدين بنشوف لو حد محتاج مساعده ونفضل معاه لحد ما يكون قادر يمشى لوحده وبعدين بننتشر فى الممشى وعلى الساعه4نقعد ناكل مع بعض ونقضى وقت لطيف ونلعب شويه وبعدين على الساعه6 بنطلع كروز وطبعا عشان الامان الى بيطلعو معانا لازم يكونو معديين المرحله التانيه على الاقل الى هى مرحله التى استوب وطبعا الادمنز بيفضلو موجودين عشان نحافظ على الناس الى معانا🫶🏻
7_هل التيم بتاعكم يقبل أعداد أكتر من كدا ؟
اكيد طبعا ممكن نقبل اعداد اكتر وساعتها عدد الاورجنايزرز هيزيد.
١٠- نصيحتكم للناس اللي عايزة تبدأ في الأسكيت ؟
الناس اللي عايزه تبدأ اسكيت ممكن تنزل تجرب في ناس كتير بتأجر اسكيت أو ممكن تنزل مع تيم وهيساعدو طبعا وممكن قبل م تنزل تجرب تشوف فيديوز تعليميه وتبقي تطبق المعلومات تجريبي لما تنزل وطبعا لازم يكون معاها حد بيفهم فى رياضه الاسكيت🫶🏻
١١_ أي هي أماكن اللعب بالنسبة ليكُم؟
اماكن اللعب أغلبها أكاديميات وبتدفع فلوس علشان نلعب فيها وممكن ننزل اماكن عامه علشان الغير مقتدر علي دفع اشتراك الأكاديمية وطبعا في الكروزات ف احنا بننزل اسفلت ونبدأ نتجول في الشوارع
١١_تعلم الاسكيت يشترط انه ينزل على الواقع ولا على الأنترنت؟
في ناس ممكن تتعلم علي النت لكن احيانا يفضل يكون في حد علي ارض الواقع علشان لو في خطأ في الحركه يعرفهاله، وعشان ميتعرضش للخطر والموضوع يكون امان اكتر.
أماكن بيع الاسكيت أونلاين ؟
حاليا اضمن الاماكن
Vlogo sport
King skate
Voka skate
و pro skate
إجابات الليدرز: أنس، كِنزي
لينك جروب التيم
https://chat.whatsapp.com/JROJqrdhbXtJWGtiikRYOE
تعرفنا على التيم بشكل عام، طرحنا بعض الأسالة على أعضاء التيم للتعمق في الرياضة والمشاكل التي تقابلهم ..
1_ أي هدفكم من رياضة الأسكيت ؟
_اعرف ناس جديدة وأخرج في اماكن جديدة اول مره اروحها
_ اكون كويسة جدا في الاسكيت واتعلم حركات جديدة
_ أمارس الرياضة نفسها واتطور فيها
_ في الأول كان هدفي بس اني اطلع الطاقة اللي جوايا وإني أخرج كتير من البست والف الشوارع واتعرف على ناس بعد كده بقى هدفي إني اتطور فيها كرياضة
_ أني أوصل لمستوى كويس واستمتع وأخرج المشاكل اللي في دماغي
_ امشي بكل مكان فيه وابقى محترفه اكتر .
*2_ إزاي أثرت عليكم رياضة* *الإسكيت للأحسن؟*
حسنت من نفسيتي أوي ولياقتي _كمان وعرفت ناس جدعه شبهي بحُبها للأسكيت
_إني بعدت عن كل حاجه وحشه وخلتني أهتم بحاجه معينه وهي الاسكيت.
_ أن انا الأول كنت مش عارف حد ودلوقتي بقيت اجتماعي وكمان لقيت نفسي في رياضة الاسكيت
_ أثرت على نفسيتي للأحسن وكمان عرفتني على ناس بردو ودي حاجه خلت نفسيتي تتحسن وطبعا خلت حركتي وجسمي احسن.
_ان دايما الاسكيت ملجأي الوحيد لو حصل اي ضغط مش بعمل أي حاجه غير انزل بالأسكيت وحقيقي أجمل حاجه في الدنيا
_ خلتني إنسان اجتماعي
اتحسنت نفسيا وبقى مودي احسن بكتير من عضلة ورجل وكدا
*3_ أي الخطط المستقبلية ليكم مع الاسكيت ؟*
احاول اطور وابقى احسن من نفسي دلوقتي
_اتعلم سلايدات وحركات جديدة واسافر محافظات وانزل ايفنتنات
_اكون مختلفة زي ناس كتير مشهورة
_إني اتحسن فيه واخد بطولات واعرف عنه اكتر واقدر الف بيه اماكن كتيرة
_افيد الناس اللي لسه داخله جديد في رياضه الاسكيت .
_ادرب اكتر واحترفه واشتري واحد
*4_ أي المواقف السلبية اللي اتعرضتوا ليها وانتوا في الشارع بسبب الاسكيت ؟*
الناس اللي بتدايق فينا وتشتم بدون اي سبب من ناحيه انها رياضة جديدة.
نظرات الناس وتبدأ تقول كلام يدايق أو عربية ترخم ويكون قاصدها تخبطنا
_ الطرق نفسها مش كويسة ووقعتني كذا مره
_*مين كان المشجع الاول ليكم* *علشان تمارسوا رياضه * على أرض الواقع مع تيم كامل*
_تيم بيجينرز كان اكتر تيم ساعدني ودعمني في اختيار الاسكيت وعلموني حجات كتيرة برعاية الليدر
أنس ..
_نفسي
_التيم
_أُمي أول حد شجعني وبعديها بابا
*أكتر مسافه قطعتوها بالأسكيت*
20كيلو
4كيلو
من الزمالك لحد نجيب محفوظ
جريدةُ أثر يستحق أن يرى تتمنى للتيم كل التوفيق ونتمنى أن يكن هناك وسائل تساعدهم لممارسة هذة الرياضة الممتعه دائما دون أي خسائر، والجريدة تدعمُ الرياضة ومُمارسينَها.
بقلم:بسملة رجب
تعليقات
إرسال تعليق